“Bakı, Gəncə şəhərləri, Qusar, Quba və Xaçmaz rayonlarında əlilliyi olan qadın və qızların ictimai xidmətlərə çıxışının təkmilləşdirilməsi” layihəsi çərçivəsində növbəti təlim Bakı şəhərində, “Çıraq Plaza”da təşkil olunmuşdur. Təlim gün ərzində Etika Akademiyasının direktoru, peşəkar təlimçi Günel İbrahim tərəfindən aparılmışdır. Təlimin keçirilməsində məqsəd dövlət qurumları, vətəndaş cəmiyyəti və özəl təşkilatların iştirakı ilə əlilliyi olan qadın və qızlara qarşı ictimai yerlərdə mövcud münasibətin dəyişdirilməsinə dəstək göstərmək, onlara qarşı zorakılıq hallarının qarşısını almaq və onlar üçün ictimai xidmətlərin əlçatanlığını və keyfiyyətini artırmaq olmuşdur. Təlim zamanı Günel İbrahim tərəfindən maraqlı metodlar və yeni yanaşmalar tətbiq edilmişdir. İştirakçıların diqqətinin beyin məşqləri ilə yoxlanılması, ilkin testlərin aparılması və təlimdən sonra yekun testlərin keçirilməsi auditoriyanın xüsusi marağına səbəb olmuşdur. Təlimdə əsasən dövlət təşkilatlarının əməkdaşları və xidmət personalı üçün
əlilliyi olan qadın və qızlara yönəlik peşəkar etik ünsiyyət üzrə praktiki təlimatlar verilmişdir. Xidmət mütəxəssislərinin öhdəlikləri və vəzifələri ilə bağlı təlimatlandırma isə daha böyük maraq doğurmuşdur.

Xidmət mütəxəssisi (Social service specialist) – xüsusi qayğıya ehtiyacı olan insana evdə və ya xidmət mərkəzində qulluq göstərən, bu sahədə peşəkar təhsil almış mütəxəssisdir.

Xidmət sənədi (Service document) – müraciət edən şəxsin qayğıya ehtiyacı olub-olmadığını, qayğı dərəcəsini, xidmət və təminat növlərini əks etdirən və xidmət heyəti tərəfindən hazırlanmış
hesabatdır.

Təlimdə iştirak edən dövlət qurumlarının əməkdaşları iş yerlərində qarşılaşdıqları problemlərin aradan qaldırılmasında faydalı məlumatlar əldə etmişlər. Təlim iştirakçıları bu formatda təlimlərin davamlı təşkilinə ehtiyac duyduqlarını xüsusi olaraq qeyd etmişlər.

Qeyd: Təlimin keyfiyyətli və cəlbedici olması, kübar cəmiyyətin formalaşmasına, insanlarda – xüsusilə də əlilliyi olan qadın və qızlarla davranış qaydalarının və ünsiyyət bacarıqlarının artırılmasına mühüm nailiyyətlər qazandırmışdır. Təlimin KİV-lərdə və televiziya proqramlarında geniş işıqlandırılması əhali arasında maarifləndirmə işlərinə mühüm töhfə vermişdir. Bu səbəbdən də təlimlərin gündəmdə qalması və davamlı təşkili əhalinin maraq dairəsində önəmli yer tutmuşdur.

Təlimlərin təşkilinə yanaşma baxımından onların reytinqi getdikcə yüksəlməkdədir. Bu da dövlət qurumları nümayəndələrinin marağını artırır. Keçirilən təlimlərin yüksək keyfiyyəti, psixoloji təsir gücü və mütəxəssislərin bacarıqlarının peşəkarlığı iştirakçıların fəallığını artırmışdır. Etik normaların təbliği məqsədilə bu formatda təlimlərin keçirilməsi layihənin uğurlu fəaliyyətlərindən biri hesab olunur. Layihənin təlimçisinin maraqlı və innovativ yanaşmaları təlimlərin aktual mövzular üzrə gündəmdə olmasına böyük təsir göstərmişdir. Sosial şəbəkələrdə aparılan təlimatlandırmalar da layihənin ictimai reytinqini yüksəltmişdir.

Təlimlərin keçirilməsində test materiallarının hazırlanması iştirakçıların bilik və bacarıq səviyyəsinin ölçülməsi məqsədini daşımışdır. Təlimlər zamanı ilkin və yekun testlər vasitəsilə iştirakçılar arasında qiymətləndirmə aparılmış, həmçinin fərdi konsultasiyalara yazılanların əksəriyyətinin sosial sahədə çalışan şəxslər olması diqqət çəkmişdir. Sonda təlim iştirakçılarına sertifikatlar təqdim olunmuşdur.

Təlimdə iştirakçı sayı: 35 nəfər
Tarix: 15 oktyabr 2024-cü il
Məkan: Bakı şəhəri