“Əlil Qadınlar Cəmiyyəti” İctimai Birliyinin (ƏQC.İB), qadınlara qarşı zorakılığa son qoymaq məqsədilə BMT-nin Etimad Fondunun (UN Trust Fund) maliyyə dəstəyi ilə “Bakı, Gəncə şəhərləri, Qusar, Quba və Xaçmaz rayonlarında əlilliyi olan qadın və qızların ictimai xidmətlərə çıxışının təkmilləşdirilməsi” layihəsi çərçivəsində Xaçmaz rayonunda növbəti təlim təşkil olundu.
Təlim Kiçik və Orta Biznesin İnkişafı Agentliyinin (KOBİA) Xaçmaz Regional Şöbəsinin ofisində keçirildi. Ofisin regionda müasir standartlara cavab verməsi, rahat şəraiti və xüsusi dizaynı təlim iştirakçıları tərəfindən maraqla qarşılandı. Təlim bir gün ərzində təşkil edilmiş və Etika Akademiyasının direktoru Günel İbrahim tərəfindən xüsusi formatda aparılmışdır. Layihənin dəstəyi ilə keçirilən bu təlimin məqsədi – dövlət, vətəndaş cəmiyyəti və özəl təşkilatların iştirakı ilə əlilliyi olan qadın və qızlara qarşı ictimai yerlərdə münasibətin dəyişdirilməsinə dəstək vermək, zorakılıq hallarının qarşısını almaq və onlar üçün ictimai xidmətlərin müyəssərliyini və keyfiyyətini artırmaqdır. Təlimdə əsasən dövlət qurumlarının əməkdaşları və xidmət personalı iştirak etmiş, əlilliyi olan qadınlar və qızlara diqqət yönəldilməklə onlarla peşəkar etik ünsiyyət sahəsində praktiki təlimatlandırılma aparılmışdır. Təlimdə iştirak edən dövlət qurumlarının əməkdaşları, iş adamları və sahibkarlar təlimin təşkilindən məmnunluq ifadə etmiş, bu cür maarifləndirmə tədbirlərinin davamlı keçirilməsinə ehtiyac olduğunu bildirmişlər.
QEYD: Dövlət qurumları nümayəndələrinə keçirilən təlimin keyfiyyəti, psixoloji təlqini, və təlimçinin peşəkar bacarığı bu formatda təlimlərə olan marağı daha da artırmışdır. Təlimlərin keçirilməsi layihənin uğurlu fəaliyyətlərindən biri kimi qiymətləndirilir. Layihənin təlimçisinin təlimlərin keçirilməsində maraqlı və gündəmi izləyən taktiki yanaşmaları bu sahədə diqqəti artırmışdır. Sosial şəbəkələrdə davamlı olaraq gündəmdə qalması layihənin ictimai reytinqinə müsbət təsir göstərmişdir. Öyrədilən materialların mənimsənilmə səviyyəsini ölçmək məqsədilə təlimin əvvəlində və sonunda test sualları paylanılmışdır. Təlimin sonunda konsultasiyaya yazılanların qeydiyyatı aparılmışdır. Sonda təlim iştirakçılarına sertifikatlar təqdim olunmuşdur.
Qadınlara qarşı zorakılığa son qoymaq üçün BMT-nin Etimad Fondu (UN Trust Fund) – yerli və milli səviyyədə qadınlara və qızlara qarşı zorakılığın bütün formalarının qarşısını almağa həsr olunmuş yeganə qlobal qrant vermə mexanizmidir.
The UN Trust Fund to End Violence against Women (UN Trust Fund) is the only global grant- making mechanism dedicated exclusively to addressing all forms of violence against women and girls.
Layihə Bakı, Gəncə şəhərləri və Quba, Qusar, Xaçmaz rayonlarını əhatə edir və sentyabr 2022 – avqust 2025 tarixlərini (cəmi 36 ay) əhatə edən dövrdə icra olunacaq.
Təlimdə 26 nəfər iştirak edib.
Xaçmaz rayonu – 24 sentyabr 2024-cü il
