“Əlil Qadınlar Cəmiyyəti” İctimai Birliyi (ƏQC.İB) tərəfindən BMT-nin Etimad Fondunun (UN Trust Fund) maliyyə dəstəyi ilə həyata keçirilən “Bakı, Gəncə şəhərləri, Qusar, Quba, Xaçmaz rayonlarında əlilliyi olan qadın və qızların ictimai xidmətlərə çıxışının təkmilləşdirilməsi” layihəsi çərçivəsində tədbirlər davam etdirilir. 28 avqust 2025-ci il tarixində Ağstafa rayonu Yazıçılar Evində Dəyirmi Masa təşkil olunub. Dəyirmi masanın təşkili əlilliyi olan qadın və qızların sosial problemlərinin həllinə həsr olunmuşdur. Tədbirdə Ağstafa rayonunda əlilliyi olan qadın və qızların hüquqları, psixoloji dəstək, sosial müdafiə və məşğulluq imkanları ilə bağlı geniş müzakirələr aparılıb. Dəyirmi masanın keçirilməsində əsas məqsəd əlilliyi olan qadınların ictimai xidmətlərə bərabər çıxışının təmin edilməsi, zorakılığa qarşı mübarizə yollarının araşdırılması və diskriminasiyanın aradan qaldırılmasının vacibliyini vurğulamaq olub. Dəyirmi Masada Ağstafa rayonu İcra Hakimiyyəti Başçısı Aparatının İctimai-siyasi və humanitar məsələlər şöbəsinin baş məsləhətçisi Leyla Zeynalova, Ağstafa rayonu İcra Hakimiyyəti Başçısı Aparatının İctimai-siyasi və humanitar məsələlər şöbəsinin müdir müavini – dini qurumlarla işin təşkilatçısı İsa Məmmədov, o cümlədən rayonun digər dövlət qurumlarının nümayəndələri, bələdiyyələr, sosial xidmət orqanları, məşğulluq və turizm strukturları, təhsil və səhiyyə müəssisələrinin təmsilçiləri, eləcə də QHT-lər və icma üzvləri iştirak ediblər. Tədbirdə əlilliyi olan qadınların sosial problemlərinin həllinə yönəlmiş yeni dəstək qruplarının yaradılması, şəbəkələşmənin gücləndirilməsi və innovativ ideyaların paylaşılması ilə bağlı təşəbbüslər irəli sürülüb.